هاستنى أنا كتير؟!!

ايه بقالنا كتير بنكتب ولا حد جه واستسمحنا يعملنا كتاب ايه ايييييييييه؟
 بنكتب لحلاليف والله ده لولا الانفلونزا الحلاليف كانت تشم عنكوا

ايه اعمل ايه تاني جبنا كومبيوتر ووصلنا النت ومش اي نت ده 512 وعملنا
حساب ع الفيس بوك وبقينا بنكتب وبنشتم صغير وكبير وبنستغل ازهى عصور الحرية  والديموقراطية اسوأ استغلال,  ولعبنا في اساس الهامش ولخبطنا معالمه, وعرضنا امننا الشخصي للخطر فاضل ايه بقى, (بس الكبير كبير واحنا صبيانك يا معلم) 

 اييييييييه انتوا البعدا مبتحسوش, معندكوش دم خالص مش شايفين قد ايه بضحي وسايب شغلي واكل عيشي وبكتب عشان ابسطكم  واتنازلت  وأنا بكامل قواي العقلية عن طريق الجوائز واخترت الطريق الصعب



وبعدين ايه ده؟!! كله بيكتب على كله؟!!
   ايه كمية الكتبة دي عاملين زحمة حتى ع النت طب مين اللي هيقرأ وفاكرين نفسكوا جامدين ماهو صحيح كل واحد عجبه عقله وانا بحاول احسن دخلي

الله يخرب بيوتكم هزيتوا ثقتي في نفسي يا بهايم, احسن مني في ايه الكتاب 
اللي طالعين في المقدرجديد عشان تشتروا كتبهم,  واسأل مين دول وبيبعوا ايه وبكام الاقي واحد تخين ربنا يشفيه والتاني اقرع ربنا يغطيه مينفعش الواحد يقرأ لهم اصلا

اما انا بقى فانتوا عارفيني واد كول اخر حاجة من ايام ما كنا بنحلق شعرنا بنق وكابوريا ونشيل تسجيل 2 باب واحنا راحين الهرم وبنستلف ووكمان نحطه في ودانا

ومثقف مثقف يعني مسارح وسينمات  ومراكز ثقافية وقهاوي  وموالد وسفارات و كتابة وقراية بمعظم اللغات الحية وبعض الميتة 
وطول عمري مفارقش باطي الجرايد المستقلة والحكومية, ومتابع لكل البرامج الثقافية والحوارية يعني عصير كتب شربنا ومن أول السطر بدأنا وع القهوة قعدنا والعاشرة مساءا اتظبطنا وسينما الأطفال دخلنا

عايزين ايه تاني, اعملكوا ايه عشان ارضيكوا وأهلي يقولوا عليا ايه بعد كم الثقافة اللي تشربتها, ده انا بقرأ وأنا طفل رضيع يا محدثين القراية والكتابة



واوعوا تكونوا فاكرين ان انا اللي هالف على دور النشر ولا خيالكم المريض مصوركم اني ممكن ادفع عشان اعمل كتاب, ده يبقى على الدنيا السلانكتيه بجد, ده انا اصلا مستحيل اقبل اقل من الشروق وابراهيم المعلم يجيلي بنفسه يعرض عرضه وهابقى افكر يا ابراهيم متقلقش عشان احنا اهلوية زي بعض بس توعدني انك متشلش من ناحية الخطيب

حتى لا ننسى

كان لي بعض الملاحظات على موقف النظام المصري من المجزرة الإسرائيلية على اسطول الحرية,  حيث أدان الرئيس مبارك استخدام اسرائيل للقوة المفرطة واستدعت وزارة الخارجية السفير الإسرائيلي لأبلاغه الاحتجاج   أولا: منذ بضعة أعوام كانت الحكومة الاسرائيلية تطلب كثيرا من النظام المصري العمل على منع التهريب من خلال الأنفاق, وكان الرئيس مبارك له مقولة خالدة أشاد بها كل رؤساء تحرير الصحف الحكومية ( النفق له جهتين سدوا الجهة اللي ناحيتكوا) وهلل الأخوة رؤساء التحرير كثيرا لحكمة سيادته ولكن فجاة تغير الموقف المصري وأعلن عن بناء الجدار الفولازي بالاضافة إلى الأخبار المستمرة عن تفجير الأنفاق عند اكتشافها واستخدام الغازات السامة في قتل العمال,   ثانيا: كيف عامل النظام المصري شريان الحياة في يناير الماضي  واطلاقه الغاز المسيل للدموع وضربهم فضلا عن التأخير وطلب وزير الخارجية من القافلة تغيير مسارها للدخول من ميناء العريش ما دعى القافلة للتعهد بعدم التعامل مرة أخرى مع الإدارة المصرية  ثالثا: كل له دوره المحدد مسبقا ومصر لن تفعل شيئا يغضب اسرائيل وأمريكا وستنفذ كل ما يطلب منها ولكن بأسلوبها البعيد عن استعمال القوة المفرطة( سجون مبارك هي الاقل عنفا) كما تتهور اسرائيل وإذا كان العالم كله قد ادان اسرائيل فلما لا نستدعي نحن ايضا السفير الاسرائيلي حتى تهدأ الأمور وحتما ستهدأ وستقل المطالب لتصل إلى الافراج عن المحتجزين وستواصل مصر تنفيذ ما تطلبه اسرائيل وامريكا بحصار غزة فالعدو والأهداف مشتركة بين مصر واسرائيل