رحلة ترفيهية 2

كان المفترض يكون لقاء ممتع الحقيقة, كان تنظيمي ميخرش الميه, حدثت بعض  
الأشياء البسيطة  اللي بتحصل في أي تجمع كبير


روحت استقبلت أعداد غفيرة جت بنبابيتها, عملت كشف هيئة للشباب كانوا كتير اوي رجعت تلات ترباعهم ودخلت البنات كلها( يلا يلا منك له من هنا مفيش مكان) 

أخ زميل عرفني على أخ تاني وقال عليه جينيس واستسمحني أركبه معانا 

خش يا جينيس بس حاول تبعد عني طول اللقاء (كان باين من ريحته أنه جينيس جامد)

اتجمعنا الصبح وركبنا التكاتك وزيادة في منع الاختلاط رفضت الاخوات ركوب التكاتك مع سواقين رجالة, كانت مسألة البحث عن سائقات للتكاتك أشبه بالمستحيلة( كانت أجرتهم الدبل بس لأجل الورد ينسقي العليق) وصيت الشباب يبقوا ناشفين شوية أحسن اي عيل ممكن يثبتنا

 وبدأ الموكب في التحرك 

كانت وسيلة الاتصال بينا الميسدات كنت انا اللي ماسك دفة التكاتك
اديهم ميسد يطلعوا دماغهم من  التوك توك ويبصولي

قابلتنا مشكلة العدد الزايد للبنات وأنا مقدرتش اوفر غير سواقتين ستات

كانوا اتناشر بنت, اتبرعت واحدة بتشرب بيريل تسوق توك توك تالت, صاحبه خد حسابه وازازة البيريل عشان مينفعش تشرب وهي بتسوق وقعد على القهوة يستنانا

 توك توك البنات الأول شال حلاوتهم وشغلتهم وعجبتهم وكيفتهم

التوك التوك التاني تحمل وزر كايداهم وشلاهم وغيظاهم وهرياهم ونقطاهم وفرساهم وحسراهم
 التوك توك التالت قامت بيه فتاة البيريل فقط بعد ما رفضت البنات ايضا الركوب معاها

طبعا زي ما انتو عارفين كلهم من أصحاب العاهات الثقافية واتربوا في بيئة ثقافية عميقة وده اللي خلاهم يبرعوا في أدب السجون  

تكاتك الشباب مش مهم اطلاقا ذكر اساميهم

التكاتك اللي في الاول والاخر شايلين شلت القصب, أمي قالتلي اشتري انت القصب وروح لأي عصارة تعصرهملك عشان توفر, حطينا البنات في التكاتك الوسطانية عشان نوفر لهم اكبر قدر من الحماية وشيلناهم العيش الفينو وعلبة المربى وعلبة الحلاوة وطاجن القشطة وصينية المفتئة

الله يخرب بيوتكو, العيال فكت شلت القصب وقاعدين يلعبوا بيها عاملينها سيوف وبيبارزوا بعض( خد دي... أي )
بس يا حزين على امك منك له هتكسروا القصب ولو عقلة اتكسرت هكسر رقبتكم

يا خرابي عليكم, البنات اللي مستأمنهم ع الحاجة بدأوا يفتحوا في العلب ويغمسوا
- ايه يا بت عايزه ساندوتش حلاوة ولا مربى؟
- لأ يا اختي أنا عايزه مفتئة

يا أخت حلاوتهم, حرام عليكي انا مش أستئمنتك ع الحاجة ينفع كده برده
- ايه يا اخويا هفتانين مفطرناش هنتبرع ازاي من غير فطار, دول حتى يرجعونا لو مشافوش الدموية رده في وشنا
-يلا يا حلاوتهم( حلاوتهم زايدة حته ياكلاوها الساعة ستة)
يا حلاوتهم اتهدي وسكتي اللي معاكي ربنا يهدكوا احنا ماشيين في طريق عام بلاش زغاريد
مفيش فايدة فيكم, ليه يا ربي أنا كان مالي ومال التبرع بالدم, أنا هخاف ع الناس اكتر م الحكومة, ده انا صارف لحد دلوقتي فوق ال 32 جنيه
منمتش من امبارح تعبان موت, ااه كان ايه اللي جابرني على كل ده
البنات اتهدت لما سمعوا أذان الضهر كله دخل تكاتيكه وخرست الاصوات
غفوت غفوة قصيرة لأصحوا على صراخ الشباب
ايه يلا فيه ايه انت وهو
- تكاتك البنات اختفت
اختفت راحت فين
- منعرفش
يا داهية دقي, دول معاهم كل الحاجة, كله كله, مفتئة وحلاوة ومربى وقشطة يعدوا خمستاشر جنيه بالمرتاح , يغوروا البنات بس انا أمي هتقطعني لو عرفت ان الحاجة ضاعت
 طب بس اختفوا ازاي, يكونوش البنات طمعوا في الحاجة ولا سواقتين التكاتك اللي طمعوا في الحاجة  والبنات

التفكير هيقتلني أصبحت وحيدا
انهرت تماما من الطعنة الغادرة, لمحت العيال بيمصوا القصب, لم اعترض ماهي خربانة خربانة,
هاوري وشي ازاي لأمي, قالتلي حوش الفلوس عشان قسط التلاجة, مسمعتش الكلام
وقلتلها ما انا رايح برده اطري على قلبي... سامحيني ياما

فضلت اعيط لوحدي جت فتاة البيريل طبطبت عليا وفتحتلي ازازة وقالتلي اشرب
-عشان أنسى؟
-   ---------------

رحلة ترفيهية

تعلن أسرة المثقفين الجامدين عن تنظيم رحلة ترفيهية مختلطة  للتبرع بالدم فعلى من يرغب بالقدوم ان يحرص على أن يأتي في الميعاد والمكان المحددين

 ويسر جماعة المثقفين أن يبشروا الأخوة والأخوات القادمين للتبرع بتوفير ساندوتشات مفتئة لتعويض الدم المتبرع به يحث سيأخذ كل متبرع ساندوتش مفتئة او ساندوتشين مربى أو حلاوة بالقشطة مع توزيع كيس عصير قصب لكل المتبرعين وعلى من يرغب في شربه بعدين لما يروح لأمه وخايف العصير يسمر هنعطي له عود قصب كامل بزعزوعته بشراشيبه وتبقى تعصره أمه

وحرصا على النظام نرجو من الأخوة الحضور عدم اشاعة الفوضى حيث سيتم التعامل بحزم مع هذه المحاولات فلقد لوحظ في اخر لقاء أن بعض الشباب والشابات يأتون ولا يتبرعون ويأخذون سندوتشات وعصير مما تسبب في عزوف الكثير عن التبرع بعد نفاد السندوتشات فحرصا على حق المتبرع سيتم توزيع العيش الفينو وأكياس العصير فارغة للراغبين في التبرع  وسيتم حجز صينية المفتئة وشفشق العصير التي سيدور بها مسؤولي الرحلة على المتبرعين أثناء عملية التبرع

ملحوظة (السندوتشات درجة أولى مصنعة من العيش الفينو الفاخر والمفتئة عسل أسود وحلبة وسمسم والقشطة فلاحي والمربى فاكهة كتير سكر قليل)

ووضعت إدارة الرحلة برنامجا شيقا لجذب السادة المتبرعين والمتبرعات  بعد وقبل عملية التبرع فيبدأ البرنامج منذ الصباح الباكر حيث تم تأجير1 مرجيحة مولد النبي  بالعامل موديل 1945  و2 قادوس حديث استعمال طبيب للترفيه على السادة المتبرعين مع رفع شعار ليه تركب مرة لما ممكن تركب مليون مرة

ونعلن عن المفاجأة الكبرى حيث تم حجز الدور العلوي بالكامل في اللانش النيلي الفاخر الرابط بين ضفتي النيل يعني هنروح ونرجع 3 مرات ببلاش 

 وتيسيراعلى الأخوة تم توفير عدد سبع تكاتك( منهم أثنين حريمي في الوسط ) تحت أمر قيادة الرحلة لنقل المتبرعين من مواقف الميكروباص ومحطات القطار لمكان التبرع والعكس بالاضافة إلى التنقلات الداخلية ونهيب بالأخوة عدم دفع أي مبالغ لسائقي التكاتك لأن الحساب واصل

مش مصدقني؟

بعد البوست اللي فات احترت واكتئبت بعد ماقولتولي انه كان بوست حلو أنا من عادتي اني مكررش نفسي وإذا كان ده حلو فلازم اللي  جاي يكون أحلى لدرجة اني فكرت اعتزل واقعد في البيت واسيب قرار الحجاب حسب تساهيل ربنا, بس أنا نفسي أعرف ايه اللي عجبكوا فيه عشان اعمله تاني, واكتر من كده  فضلت ادور على فكرة اكتبها مش لاقي  واقول يكونش عجبهم صراحتي في كشف زيفهم  يكونوش بيحبوا جلد الذات وغاويين يهزؤا نفسهم بس انا كنت مكسوف  وأنا بهزأكم  وبعدين أنا مالي بيكم أصلا يوووووووووووه اييييييييييييه دنيا انا آسف يا جماعة بقالي فترة مهزوز ومش عارف الهزة جاية منين ايه رأيكم يا جماعة احكي قصة حياتي واخلص و ممكن ربنا يكرمنا ونعبيها في  شرايط  والمغناوتية يلفوا ع القهاوي يغنوها ع الربابة ولا اعمل سلسلة افلام زي طارق طفلا وطارق مراهقا وطارق دائما  وطارق في الجامعة وطارق في الجيش  وطارق في بير السلم وطارق في الحمام  بس الحكاوي هتبقى  مفيهاش تسلية  يعني وثائقية اكتر ما هي  دراما  انا كده مبكذبش في حاجة خالص لما بحكي عن نفسي اصل فيه ناس استغربت من موضوع القراية وأنا طفل رضيع, عادي والله ناس كتير كدة مش معجزة يعني وادي خبر اهه منشور في جميع الصحف ووكالات الأنباء  بيقول طفل رضيع برضه مش بس بيقرأ لأ ده كمان بيقدم وصفات طبية لأهله, جايب حاجة أنا من بيتنا, شوفوا ربنا  قادر ازاي على اظهار الحق قدام كل اللي شكك في كلامي   وحتى لما اكلمت على حتة اني واد كول والله انا متعود زي ما قلت مكلمش على نفسي و متسامح باسيب الناس تتكلم عني بمنتهى الحرية اللي يقول حلو يبقى شكرا واللي يقول وحش يبقى يقعد له في صحته وعفيته والهي اللي فيا يجي فيه  وعشان  مفيش كلمة بتطلع مني زي ما قلنا وهنقول ونعيد ونزيد  الا لما تكون موثقة  ادي خطاب رسمي مبعوتلي على يد محضر بتشرح فيه أخت من الأخوات الحالة الصعبة اللي وصلت لها,    الخطاب مكتوب بخط ايدها يعني متقدرش تنكر بس من منطلق مبدأ  ربنا يستر على ولايانا  أتحفظ على ذكر اسمها  الحقيقي واكتفي بالنيك نيم اللي هو هنو زي ماهي كاتبه (هنو؟!! بغض النظر عن رداءة النيك نيم بس صدقوني كانت أجمد واحدة بين أقرانها)    ومن العينة دي كتير والنعمة, على رأي أمي بلاوي وبتتحدف علينا بس ادي ضريبة التواضع