الخميس، يناير 28، 2010

شكلك بتاخد فيزا

الفيزا بتاعتي اتسحبت, روحت اسحب فلوس دخلت البين كود 3 مرات غلط فسحبوها خدوني على خوانة, اه يا قلبي هتبات بعيد عن حضني بره محفظتي, يا ترى هتلاقي حد يغطيها يارب يكون اتسحب معها كزا كارت عشان تنام وسطهم وماتبردش

كانت ليلة منيلة بستين نيلة, بلا نوم فقط  بكاء ونحيب ويهدوا فيا ويقولولي ولا يهمك يابو محمد ان مكانش انهاردة يبقى بكره ياخويا, وانا دماغي والف صرمة اني اسحب انهاردة(هي حبكات) 

تاني يوم روحت فرع الشغل الموظف قاللي روح الفرع اللي اتسحبت منك فيه في الفترة المسائية  قلتله طب مفيش مراسل رايح الوقتي ياخد الكفر بتاعها اصلها بايته عريانه من امبارح
المصيبة الكبيرة انهم قالولي لو مافتكرتش البين هايعدموها وهايدفعوني يجي ميت جنيه ويطلعلولي واحدة مكانها, كان هايغمى عليا والنعمة, فضلت الطم على وشي, ميت جنيه ؟! اعدموني معاها ياخرابي ياني, فعلا المصائب لا تأتي فرادى بيجوا اتنانات او تلاتات كده مع بعضيهم

أنا السبب أنا السبب, كنت متبع لسياسة امنية اخترعتها بنفسي كان البين لو جه في دماغي كنت بغيره ليكون حد جنبي بيقرأ افكاري, كنت كتير بصحى من نومي مفزوع اطمن ع الرصيد واغير البين, كان اي بين عندي عمره الافتراضي ساعة او اقل قليلا
استغنيت عن حمامي الطويل لأني مابعرفش امسك التليفون وايدي مبلولة وطبعا مستحيل اشغل الاسبيكر لاعتبارات امنية حادة وللاغراء الموجود في صوت الميه بس اهي طبلت في الاخر على دماغي يا سنة سوخة يا ولاد

بحاول افتكر مش عارف الارقام كلها دخلت في بعض, افتكرت وانا باستلم الكارت من البنك اول مرة, شعور جميل ان يبقى معاك كارت تخبطه في الحيطة ينزل فلوس, يوميها حضنت موظف البنك وهو بيسلمهولي, وقلتله كتر الف خيرك, وسألته عن حاجات كتير كانت في بالي, جاوب بمنتهى الصراحة, حاولت اعرض عليه اكرامية ليه وباقي الموظفين حلاوة الكارت الجديد, بس مش عارف ليه مارضاش, تقريبا كان طمعان في مبلغ اكبر, مع انه كان مبلغ كبير, يلا هو الخسران, فكرت اخدله بلاص مش ولا عسل اسود من اللي امي بتبعتهم كادوه يعني, بس استخسرتهم في امه بعدين, بيتعنطز علي ليه ابن الكئيبه ده مش عارف, ماكان ياخد اللي فيه النصيب ويحطهم في جيبه وسكتم بكتم, 

لما خرجت من البنك كنت طاير من الفرحة وفضلت اخرج الكارت من المحفظة ثم من الكفر وارجعه تاني, أقرأ اسمي عليه, ساعتها حسيت ان بقى ليا قيمه مرتب ثابت كل شهر, امان وضمان تام سريه في التعامل اخد قرض بأي قيمه اخش عند اي بقال اشتري تمن جبنه ولا علبة حلاوة وبالفم المليان( بتاخد فيزا) وف لحظة ايدي تندب في------
جيبي اللي ورا واطلع المحفظة والكارت, بقالين من ايام الديناصورات يقولي هي مستاهلة,  ايوة يا اخويا ايوة يا حبيبي اعمل ايه بيئه حقيقي, هاعزل من ام المنطقة دي 

يتبع 


الأربعاء، يناير 27، 2010

أنا وعمتي

فاكرين لما عمتي بعتت لي رسالة وأنا افحمتها في ردي اهي عمتي الحمد لله تجاوزت موضوع الافحام وقررت انها تبعتلي تاني (نقلا عن رسالتها حرفيا بالرغم من ركتها واخطائها اللغوية الفظيعة) 

قسم المصريين عند الزواج أقسم برب البرية ان اكون مطيعا للولية وان اسلمها المهية وكل الحوافز الشهرية وحسابات البنوك المخفية وانسى كل النسوان دية وان اقطف لها الملوخية وان اكون في البيت قبل المغربية وحسبي الله ونعم الوكيل في العيشة دية

فاكرة اني مش هاعرف ارد مش عارفة اني مفييش الا لسان وكل ما اخش في خناقة برد على كل الضرب بلساني, والله بخلي اللي يضربني يندم انه مد ايده عليا وساعات كمان بدعي عليه وانا بصلي يعني هايروح في داهية وهيخش النار يلا منهم لله بقى على كترهم
معلهش يا جماعة دخلتكوا في امور شخصية كانت مترسبة عندي من زمان بس الحمد لله في طريقي للتخلص منها لأني الوقتي شخص محترم لا حد بيمد ايده عليا ولا انا كمان بطول لساني على حد, وكل اللي بشتمهم شخصيات اعتبارية أو ناس كبيرة قوي مش هتاخد بالها مني المهم ادي ردي مع الوضع في الاعتبار قصر المساحة لأنها رسالة اس ام اس  يا جماعة

قسم المصريين عند الطلاق, الحمد لله نجتني من الرزية ندرا على من الوقتي اكون خير البرية واتبرع بنص المهية واعيش بجد حياة العزوبية راهب في ام الحياة دية لا اقرب من صنف النسوان ان شاء الله معزة معدية

رجاء: ماحدش والنبي يقول لعمتي اصل ترجعلي عقدة الضرب تاني

الثلاثاء، يناير 26، 2010

ولدت لأدون

بعدت الفترة الأخيرة عن التدوين حتى أقيم تجربتي الطويلة في المجال ولتضح الصورة أكثر
بعدت وفي زهني سؤال صعب وهو هل سأكمل التدوين ام لا وهل حالي قبل التدوين افضل أم بعده أم سيان( ضع خطا تحت الاجابة الصحيحة),
بالطبع لا أريد أن أحدثكم عن كم الرسائل والمحادثات والفاكسات والايميلات والاس ام اس التي أتتني من جميع أنحاء العالم تسأل وتستفسر عن سبب التوقف وتستحثني راجية أن أعاود الكتابة لأنهم لا يقدروا عن بعدي عن الكتابة بالطبع لا أخفي اعجابي وتقديري لهؤلاء وطلباتهم وعملا بالحكمة الخالدة ما استحق أن يولد من عاش لنفسه قررت محاولة العودة مجددا بالرغم من
 الأسئلة الكثيرة التي كانت تعتريني وقلبت حياتي رأسا على عقب للحد الذي بدات أن أردد في نفسي أنا مين؟ أنا مين؟ أنا مين؟ وماذا أريد؟ وماذا أريد؟ وماذا أريد؟ كل سؤال 3 مرات اصل انا حقاني
هل أريد المال؟ إذا كم أريد منه وما نوعه ومتى سأكتفي
هل أريد الشهرة وماذا ستفيدني وماذا سأفعل لو تحولت لجرسة
هل أريد النجاح إذا سأخسر أعداء النجاح 
هل أريد الاستقرار ولكن أين المقر الذي سأستقر فيه
إذا ماذا أريد من هذه الدنيا, حقا لا أعرف سأستمر هكذا بلا هدف حتى أجد نفسي حينها ربما سأسعى إلى تحقيق هدف ما

FEEDJIT Live Traffic Map

FEEDJIT Live Traffic Feed