هنا كنت موجود

حالة رعب فظيعة مسيطرة عليا اليومين دول من السواقة, زي أي انسان بتأثر بكل اللي بشوفه وطبعا شوفت حوادث كتير

بدأت أسوق فعليا من شهرو الحمد لله مش متهور في السواقة يعني مبعديش 120 بس أكيد حاطط احتمال الحوادث اللي بتحصل لأي حد, (بس ساعات قليلة بعدي 120 وبحس اني طاير وبتناتبني نشوة غريبة)

كل ده مش قلقني بالعكس أنا مؤمن جدا بقضاء الله ( لكل أجل كتاب)
(وما تدري نفس ماذا تكسب غدا وما تدري نفس بأي أرض تموت)

اللي قلقني بقى صفحتي في الفيس بوك هيحصل فيها ايه والناس اللي متعرفنيش الا من  خلاله هتعرف ازاي أني مت

كم الأصدقاء اللي فضلت اربيهم على مدار سنتين  تلاتة هي مدة علاقتي بالفيس بوك هيعرفوا ازاي اني توفاني الله, طب مين هيحكيلهم عن ظروف الحادث الأليم و اللي خطف زهرة شباب الفيس بوك

للسبب ده ولأسباب أخرى بكتب وصيتي دلوقتي ليكو. لو مدخلتش على صفحتي وعملت أي نشاط يعني كتبت نوت أو علقت تعليق او على الأقل أظهرت أعجابي بأي شئ لمدة أسبوع متواصل فأرجوكم ان تتترحموا عليا وتعتبروني في عداد الأموات وأصدقائي الصدوقين يعتبروني في منزلة الشهداء
(خلاص يا طارق, حرام عليك نفسك)

وبالمناسبة دي أحب أعرفكم أني اخترت اتنين من الأصدقاء على الفيس بوك واديتهم الباسوورد بتاع حسابي عشان يردوا على تعليقاتكم ويحافظوا على صفحتي مفتوحة علطول ووصيتهم بطبع نوتي اللي كتبتها ويوزعوها صدقة ونور على روحي, والحمد لله ربنا قدرني وحطيت مبلغ من المال كوديعة ثابتة في أحد البنوك الإسلامية يصرف ريعها في عمل جروب خاص بي على الشبكة العنكبوتية ودفع ايجار مقر بسيط يجتمع فيه الأعضاء  وتقديم المشروبات لمن يأتي من الأعضاء واستقدام شيخ فقي لقراءة بضع أيات من القرآن الكريم كل خميس بعد صلاة العشاء
( وحد الله يا عم طارق)
لا اله الا الله, مش قادر
(هتشيل الهم دنيا واخرة, انت بس اتكل على الله واحنا هنبقى نتصرف)
بس يا بن الجزمة متطلعنيش من لحظة الشجن دي

شريط الذكريات بيمر قدامي,
(يلا يا عم هتلاقي هناك كله متسجل صوت وصورة, ابقى اتفرج عليه براحتك)
كدة با ابن ----- قطعت حبل أفكاري