نفسي أبطل كسل حاسس ان لو لقيت حد يشجعني هأبقى حاجة تانية على أساس أني الوقتي حاجة أولانيةو المهم الحد ده يبقى واحدة,لأني زهقت بقى, يرضيكو أنى من سن 11 سنة لم أختلط كرهت الجامعة بسبب عدم الأختلاط, تصدقوا أن طلبة جامعة الأزهر بيركبوا القطر مخصوص علشان فيه أختلاط, انا أعرف طلبة كان بيركبوا القطر بس يعني رايح جاي في القطر ومبيروحوش الجامعة, وانا كمان كنت حابب الحكاية دى والله أنا مرة (مرة دى اللي بتتقال في النكت أنا راجل وسيد الرجالة)المهم مرة طقت في دماغي وسبت الامتحانات اللي كانت يوم ويوم وقلت أنا هاروح بقى كله يقولي يابني ماينفعش دي المادة صعبة ومش هتلحق تخلصها وأنا ولا هاممني يا جماعة دي آخر مادة ولازم أشوفها قبل ما الترم يخلص , أنا كنت متفائل قوي , مش عارف كدة ساعات بيجيلي شعور أو أحساس( أختارو أنتو الكلمة المناسبة ماهو لازم يبقى بوست تفعالي علشان محدش ينام) أن هاشوفها واليوم ده بيقبى ايزي وفعلا دورت عليها في القطر ولقيتها وتكلمنا وأنا كنت طاير , كانت الله يمسيها بالخير (مطرح ماهي قاعدة وزمانها كبرت وبقت أم ) طموحة أوي وكانت بتكلمني شفقة أصل أنا كنت طيب وبرضى بقليلي وهي كانت في المرحلة دي بتبحث عن الرجل المناسب اللي هايكمل معاها مشوار حياتها والقطر كان زحمة فقاعدة الاختيار كانت كبيرة قوي عندها , كنت كل ماشوفها ألاقيها بتختبر واحد شكل حتى لقيتها مرة قاعدة مع جوز كمسارية أتاريها كانت ضاربة أشتراك المكيف لأنها ملقتش حد مناسب في المميز ,مش قولتلكو طموحة