كانت دايما بتقولي, احنا شبه بعض في حاجات كتير , وكنت مستني أي خطوة ايجابية منها , بس للأسف طموحها كان عائق في طريقنا , مع أني كنت مستعد أضحي علشانها ,يعني أحيانا كنت بدفع في الميكروباص ,بس ده ماكانش كفاية ,ماكنتش عارف أرضيها ازاي ,عرضت عليها كتير أن اجيبلها كوكتيل ,بس كانت بترفض ,ولما كنت بلح عليها ,كانت بتصر علي التمسك برأيها ,فزاد اعجابي بشخصيتها القوية,كنت مؤمن أنها عندها رسالة بتحاول توصلها لأكبر قدر من المجتمع, فكانت بتستغل القطارات المزدحمة لهذا الهدف النبيل ,وعشان كدة كنت كل ما أشوفها بتنشر الرسالة كنت ببعد وأدعي ربنا أن تنشف بسرعة وتلم الرسالة ,ولما حاولت أعرف هي بتدعو لأيه,أتنرفز الأخ حديث العهد بالايمان,وكادت أن تتطور الأمور , فطلبت هي بكل الثقة أني أقوم ,وأروح أقعد في عربية تانية علشان تركز في الدعوة,وعمري مازعلت منها ,صحيح كانت بتراودني أفكار شريرة ,أني أبلغ عنها أمن الدولة,بس فضلت الأفكار في دماغي ,ولم أجرؤ على البوح بها لغيري