الحقيقة

ليه نفضل نخبي عن بعض أحنا مين وعايزين ايه, نكتب عن نفسنا ونقول لأ مش احنا مش مشاعرنا, صدقونا دي ناس تانية يبقى الاحساس جوايا من سنين ولما أطلعه أقول ماليش دعوة مش أنا, أنا بكتب عن كل الناس بحس بالآمهم وأعرف هما عايزين أيه وأنا أصلا مش عارف نفسي  

انهاردة قررت أني أعرفكم عن نفسي الحقيقي, أنا اللي بجد, أشرح لكم نشأتي من وأنا صغير لحد الوقتي, أعري فيها نفسي للي يحب يتفرج عشان هيبقى فيه صور لأول مرة والفترة الجاية ممكن أنزل فيديو كمان ونزيع وهنخلي الناس تتبسط بس هاكتفي اليوم بالصور لما أشوف رد فعلكم 

طفل برئ عمره 8 سنوات أو أقل قليلا أو أكتر مش فاكر

مكان التصوير: استديوا ايزيس, يطل على كورنيش المنصورة, صاحبه كان صاحب أبويا, كان مصوراتي العائلة

هاجر إلى المحلة الكبرى سنة 1995 أثناء الكساد الكبير اللي أصاب مدينة طلخا, أنقطعت أخباره بعد هذا التاريخ

واضح ان الريسلوشن واطي

الصورة دي وجدت منذ سبع سنوات عند خالتي  وحصلت عليها من خلال الطرق القانونية السليمة  حيث تم تسليمها من خلال محضر رسمي بعد تحقيق مطول عن كيفية خروج هذه الصورة من بيتنا,  تم ترميمها بواسطة برامج الفوتو شوب بعد حصر كم التلفيات بها

الفترة دي من حياتي, مش فاكر أنا كنت بعمل ايه وعايز ايه لأنها من زمان قوي ومش فاكر أنا اتصورت الصورة دي ليه

بس أكيد لأجل الأغراض الرسمية لأن ماكنش فيه كلام فاضي كدة لما نعوز نتصور نتصور, تذكار يعني

الحمد لله تغلبت على التبول اللاارادي وبعد فترة توجس من أمي استمرت شهور عديدة اتخذت قرارها التاريخي بالتنجيد, فازالت اثار استمريت طول فترة حياتي وقتها في رسمها

تستمر وطينة الريسلوشن

11 أو 12 سنة

سبب التصوير, كنا راجعين من مصيف جمصة وضيعت كارنيه المكتية, فقالولي هات صور جديدة ومكانش معايا

برده استوديو ايزيس  اللي هيركز في أسفل شمال الصورة هيلاقي مكتوب ايزيس عشان تعرفوا اني مبكدبش عليكم في حاجة خالص

 اواخر شهر تمانية أثناء الاحتفال بمولد البازات وده مولد شهير في طلخا وكان فيه كارت طولي مع الصور بس الراجل قالي طلعت مغمض فيه ومصدقتوش

الفترة دي كنت بقرأ كتير ميكي والشياطين ال13 والمغامرين الخمسة وبدأت اكتشف رجل المستحيل وانبهرت بيها فترة

عانيت الفترة دي من فصل البنات عن البنين بعد اجتيازنا للمرحلة الابتدائية حيث تنص قوانين التعليم في مصر على عدم الاختلاط بس حصل شئ غريب جدا وهو زلزال 92 الشهير, الحمد لله  خراب يا مصر وبكدة حققنا اللي احنا عايزينه, وكنا بنروح نبكي على الأطلال

صدر أمر ترميم لمعهدنا وبعتونا على معهد البنات بعد حصولنا على أجازة استمرت ل 3 أسابيع, بس كنا فترة مسائية وده برده حلو جدا يعني ننام براحتنا ولكن طبعا في الامتحانات لازم نروح الصبح ومكانش فيه مكان فانتشر الغش وطلعت التاني على الفصل 

 يعني بعد ما فهمونا أن عيب الاختلاط وحرام وميصحش وانتو كبرتو خلطونا غصب عنهم

   

14 سنة 

ايزيس واضحة قوي

صورة استمارة الاعدادية

لا داعي للحديث عن الرسلوشن لأنه نفس الاستوديو بنفس المصور بنفس وشي  

 أواخر مرحلة الطفولة  وبداية فترة المراهقة واضح في الصورة أني كنت رومانسي وحالم, كنت بحط سمنة بلدي على وشي عشان خايف من حب الشباب وشعري عشان أعرف أسرحه  على جنب, رجعنا تاني لمعهدنا بعد ما رمموه للأسف على امل بزلزال تاني يخفيه من على وش الدنيا أو حريقة بفعل فاعل خير تحوله لرماد 

 بدأت اخد بالي من مدارس البنات اللي كانت جنب معهدنا, كنت كل اللي بعمله في الفسحة اني أتنح ناحية مدرسة البنات على الله حد ياخد باله مني, بس للأسف مكانش بيحصل, تقريبا كانوا مشغولين في الدراسة

انهيت سلسلة رجل المستحيل أو أشرفت تعرفت على الفرقة الانتحارية ولقيت أن رجل المستحيل جنبها كانت بيض

وبعد فترة بسيطة لقيتهم هما الاتنين بيض وكانوا بيضحكوا علينا وكاتبين عليهم للشباب

زادت اهتمامتي بالقضايا العامة مثل اخر أخبار الفنانين ولعيبة الكورة كنت موسوعة 

لأن أبويا كان بيشتري الجرنان  يوميا اللي كان بيلف على الشارع ويرجعلنا تاني آخر  الليل عشان نفرشه على الطبلية

كان كل همي اني اتفرج على تاكسي السهرة وبصلي انهم يجيبوا حتة كبيرة من الفيلم ويوم الاربعاء كان فيه ماكجيفر وبعد كدة بقت اكس فايلس في اخترنا لك كانت رعب حقيقي, نادي السينما تحس انك قاعد في ندوة عن حقوق الانسان, مش عارف ليه وكنا كلنا في نفس واحد نقول( ماتخلصي يا درية وهاتي الفيلم وبلاش لت وعجن) سناء منصور على القناة التانية كانت برقبتها بس كان امنية حياتي أن أبويا يشتري تليفزيون ملون عشان أقدر اشوف كمية البويا الي حطاها على وشها, أصل مش معقولة كل التعب اللي بتتعبه ده نقابله احنا بتليفزيون أبيض وأسود 

18 سنة

ايزيس هاجر فرحنا لاستوديو فايق في المنصورة وده كنا بنعدي النيل بالمعدية فنلاقيه في وشنا علطول على ناصية شارع المدير

صورة بعد مرحلة الثانوية وبداية فترة الجامعة

تم طبع عدة نسخ ووزعت كتير قوي

شايفين القصة اللي كنت عاملها

حب الشباب ملا وشي

في الفترة ما بين الصورة اللي فاتت والصورة دي كنت مدمن معدية طلخا المنصورة كانت الأجرة بريزة أي عشرة قروش, وكانت الأخت متعهدة لم الأجرة فجأة كدة خدت بالها مني, أديها الربع جنيه ترجعلي ريال وتقولي مفيش شلن عشان تاخد الخمساتشر قرش ولما أديها نص جنيه عشان ترجعلي ريالين تقوم مدياني ربع وريال 

أنا استغربت وقلت هي بتعطف عليا ولا ايه, هي مبتاخدش الأجرة كاملة ليه, بعديها بقيت يا أما الأجرة شلن يا خمساتشر قرش بالنسبة ليا يعني  فكنت أقولها وأنا مسبل عينيا وببربش لأ مينفعش( المرة اللي فاتت مدفعتش غير شلن المرة دي بقى خدي خمستاشر) أصل مش معقول كل مرة أدفع أقل من الناس اللي كانت أجرتهم عادي جدا بريزة بس, أنا بصراحة استحليت الحكاية وقلت يا حلولي 

وكنت معجب قوي أنها اختصتني بشرف هذه اللعبة لحد ماراهنت تلاتة أصحابي مرة أنها هترجعلي الأجرة زيادة وبالفعل, فماصدقت أنها أديتني الفلوس وبعلو صوتي لأصحابي وأيديا فيها الفلوس( شفت يلا شفت مش قولتلكم هاترجعلي الأجرة زيادة) وأصحابي يهنوني ويحضنوا فيا وغنينا انتصرنا انتصرنا, بس بعد كدة بطلت تديني الباقي زيادة مش عارف ليه , أكيد قر أصحابي

180 سم أو أكتر يعني خلاص ماشاء الله بقيت زي البغل, كانت أمي دايما تقولي ياريت كان طولك جلة كنا خبزنا بيه

بعاني من مراهقة متأخرة استمرت معايا لحد الان ومش عارف اخلص منها ازاي

بدأنا نختلط تاني بس في القطر واحنا راحين الجامعة وبنشكر السكة الحديد اللي سمحت لنا بالاختلاط وبندعيلها ربنا مايولع لها قطر ولا ينيم لها ملاحظ ولا يلعب لها في جزرة

 

24 سنة

ستوديو عادل اللي قدام جزيرة الورد 

خلاص بقيت راجل ودخلت الجيش

وف أجازة من الأجازات استحميت وضربت البدلة اللي أنتو شايفينها ( الحمد لله الياقة مظبوطة والجرافتة مبططة) وقلت أروح أتصور

حطيت صورة منهم في الباسبور 

طبعا ماقدرش اتكلم عن فترة الجيش عشان كلها أسرار عسكرية بس كل اللي أقدر أقوله أني كان نفسي اتحجز شوية في أي مسشتفى عسكري, الممرضات كانوا طيبين قوي وكانوا بيندهولي ب يافندم

الجيش قضى على أي محاولة ليا في الحب والكلام الفارغ ده, لأني مكنتش فاضي فلازم نضحي من أجل مصر 

 الأجازات  كنت ببقى مسهم فيها مش عارف ليه 

2005 ذروة العمل السياسي أشتركت في مجموعة الفدائيين اللي كانت بتيسر للمصوتين دخول اللجان والحمد لله قدرنا نسقط مرشح الحكومة بس للأسف المرشح اللي نجح دخل تاني الحزب الوطني وملى البلد فراشة(كراسي وخيام ملونة) وقرر كمان يعمل تخفيض على أي عزا أو فرح احتفالا بفوزه 

دايما كان بيقعد لأخر الجلسات في مجلس الشعب  وفتحي سرور أثنى على نشاطه ووجهله خطاب شكر واتضح بعدين أنه كان بيقعد للآخر عشان يلم الكراسي
------------------------------

كفايه كدة بقى عليكم وأدي شوية صور ناشفة من غير كلام لأني زهقت هو يعني حد فيكو دافع حاجة
وأصلا الصور دي بتعكس الفترة الأخيرة في حياتي والفترة دي لسه ماتقيمتش ومينفعش اتكلم عنها قبل مرور الفترة القانونية لأنها مليانة أسرار خطيرة لم يسمح بعد بتداولها

بس عوضا عن الكلام زودت لكم الرزلوشن وده بفضل أنتشار كاميرات الديجيتال الحديثة