سياسة المصاطب

تاني موضوع النيل مش فاهم والله محموقين اوي على ايه؟  ما البلاد العربية كلها عايشين من غير نيل وعندهم البترول افضل ميت مرة من الميه وبيحلوها ويشربوا وزي الفل, والله ياريت فعلا تشربوا مية تحلية ع الاقل الشبة اللي فيها مش هتخليكوا تعرفوا تتكلموا انا عن نفسي مش مضرر خالص لأني بشرب ميه معدنية واروي عطشي ببيسي وممكن بمرهم تسلخات افضل اسبوع مستحماش ولو استحميت يبقى بلترين ميه ولا انتوا مدخلتوش الجيش ولا ايه, وكفاية بقى تلاكيك احنا كدة كدة عندنا ثورة عطش من قبل موضوع الاتفاقية عشان محدش يجي في الصيف يقول انه السبب ومش سايبينه في حاله,وهو تعبان وراجل كبير وطبعا ليس على المريض حرج وهو معاه شهادة طبية من مستشفى الماني موثقة من السفارة  عيشوا عيشة اهاليكوا لو سمحتوا ولا انتوا مشفتوش فيلم الأرض لو عطشانة بتاع عبدالهادي ومحمد ابوسويلم ده دي!! وإذا كانوا قالوا هيبنوا واديهم بنوا السد العالي فمبارك ابن الثورة يعمل اللي هو عايزه وزي ما باع مصانع الثورة فيقدر يهد سد الثورة على دماغكم بس عشان هو رحيم مش هيعملها ولا تكونوا فاكرين ان حد غاصبه على حاجة   والصلاة ع النبي الله اكبر سابهم يهلفطوا ويتكلموا ويعملوا مؤتمرات  وف قعدة واحدة جاب المعلم الكبير بتاعهم وقاله لا سدود ولا يحزنون بصوا قاعد قدامه خايف ازاي؟ وبيقوله يا ريس ده هو يا دوبك حتة سد قد كدة  كدة دي انا قستها لقتها قد علبة حلاوة المولد,  يقدر بقى الاخ ده يرجع في كلامه بعد ما اتوثق كلامه بالصور؟!!  شفتوا بقى سياسة المصاطب عملت ايه, حقيقي مكدبش  اللي قال قاعدين ع المصطبة وياه