لما كنت صغير كانت الناس كلها بتخاف مني أصل كنت دايما باعيط ولو طنشوني أفضل أصرخ لحد ما حد يعبرني لدرجة أني كنت بتعب من العياط وساعات كتير كنت آخد بريك وأكمل عياط, ولما كانوا يعندوا معايا أكتر كنت أبدأ بتكسير أي حاجة قدامي ,وهما برضه كانوا بيكسروا أي حاجة في , لحد ما زهقت وأنا صغير برضه ولقيت نفسي مش عارف أعيط, أنتهت مرحلة العياط فجأة كدة والله والناس أستغربت وكانوا بيقولولي ايه أنت مش هاتعيط ولا ايه ؟ أصل فجأة كدة  تنقطع عن موضوع العياط ده صعب ,

وأستغربت جدا للموضوع ده , أصل كان بيحصلي مصايب كتير قوي بس ماكنتش عارف أعيط , وأستمرت مرحلة التحجر الدمعي  فترة طويلة من الزمن لحد ما يئست من رجوع الدموع الى القنوات الدمعية اللي هي في العين تقريبا وساعات بتفتح في المناخير لما يبقى الموضوع واسع حبتين, وفجأة برضه وأنا بتفرج على فيلم كتيبة الإعدام بدأت الدموع في الإنهمار ساعة لما الناس كلها عرفت أن نور الشريف مش خاين وماسرقش مرتبات الجيش اللي كان متحاصر , الفيلم ده كل ما أشوفه أقعد أعيط كتير قوي , لدرجة أني أول امبارح كنت بتفرج على فيلم تايتانيك على نايل لايف وطبعا كنت باعيط , فأعلنوا أسفل الشاشة أن التالي على نايل سينما هو كتيبة الاعدام فاتقلب العياط لشحتفه , يعني شفت أسمه زاد العياط , وطبعا في قايمة الأفلام اللي باعيط لما أشوفها أفلام كتير لعاطف الطيب, بس اللي أستغربتله جدا أن الحالة زادت قوي ودخل فيها الأفلام الكوميدي بجد يعني كان أول فيلم كوميدي أعيط وأنا باشوفه فيلم عودة الندلة مش عارف ليه والعياط بدأ لما كانت عبلة كامل بتغني وهي بتحمي الحمار , فضلت أدور لها على تفسير مش لاقي, قلت جايز علشان الفيلم بيتكلم عن الأم  مش بعيد برضه  , زادت المسألة وبهوأت ومبقتش عارف أتحكم فيها يعني ساعات الفيلم أبقى شايفه ميت مرة وعادي ومعيطش قبل كدة وأنا بشوفه ومرة واحدة أعيط , ولأ فيلم بوبوس الفيلم ده شفتوا كت جدا يعني كل لما عادل  إمام يقرب من يسرا يبقى فيه قطع يعني ماشوفتش فيلم أصلا هي رقابة كدة لوحدها عملاها الشركة اللي بتوزع الفيلم والناس مش فارقة معاها أصل لانشوف الفيلم كدة يا نشوفه ف لاب توب وبرضه مش هانفهم حاجة , المهم حتى الفيلم الكت جدا ده عيطت فيه نص ساعة مش عارف زعلان من الرقيب ولا ايه

في السينما طبعا الحمد لله الدنيا ضلمة يعني باخد راحتي على الأخر, بس ساعات نوبات العياط بتنتابني وأنا بتفرج جنب الناس على فيلم في التليفزيون ومبقاش عارف أعمل ايه بيبقى صعبان على الدمع اللي محبوس وبدعي أن ربنا يفك حبسه